وحشتنى جدا

انا امى وحشتنى جدا" مححتاجه رأيها فى حاجات كتير

لسه نضارتها ع الرف ..وهدومها جوه الدولاب

وجداد ...

نفسى اتكلم عنك معاها ..واحكيلها ..

كمان هقولها مين فى مرضها زارها ..ومين غاب

وهقولها انا اسفه يا ماما انى خبيت عليكى

ما انا ما قلتش لانى خفت عليكى ..

ونفسى ارجع يوم ابوس ايديها


واعمل لها الشاى بتاعها الخفيف اللى بتحبه

وأكل معاها الجبنه بالقوطه وأقسم معاها الرغيف

انا عارفه انها سامعه ومتأكده انها حاسه

ماهو مش ممكن الموت يقتل فى الناس شعورها

ومافيش فى الدنيا شجره ممكن تتقلع من جذورها

ومافيش فى الدنيا راحل الا وسايب من صلبه شبهه

يدعى له فى صلاته


امى وحشتنى جدا ..وحاجات كتير بطلت اعملها لوحدى من يوم ما راحت .